有傳前EO2成員Eddie（彭懷安）同爭啲做自己老婆但最後分埋手嘅朱慧敏（Queenie）復合，因為有傳媒影到兩人甜蜜撐枱腳，男方仲想錫女方，但女方無縮開，行為舉止同情侶無異，問到華星冰室彭老闆係咪已o氹回前未婚妻，Eddie咁講，「同佢溝通多咗，關係幾健康，有陪佢食齋，我都有去佛堂唸經、抄經。佢係好女仔，我要做好啲！」掟煲唔掟蓋就係呢種，因為成功o氹番未婚妻，Eddie好開心，開心程度係去Shopping笑笑口，拎住戰利品手Fing Fing，Hi Happy Man。
彭老闆好開心，不過朱小姐否認喎，佢話兩人只係朋友同合作夥伴關係，仲話，「我集中喺演藝工作、冰室生意同埋學佛，想專心學好佛法先再諗感情事。」之但係Queenie喺訪問中講過同Eddie分手全因自己喺破碎家庭長大，因為想得到更多愛而要求另一半付出更多，從而令對方唔可以呼吸，同愛媾女嘅Eddie完全無關，前未婚妻識講嘢又靚又好身材，難怪Eddie要瘋狂o氹番對方。
ifc Shopping Day
日前下午，同前未婚妻愈嚟愈Close，好開心嘅Eddie同男友人去ifc Zara行街，兩人各自行，Eddie乜都啱，＄199至＄1599嘅長短袖Tee、短褲、牛仔褸同皮褸都會拼上身，仲邊揀邊笑，可能因為價錢唔貴，又可能因為囡囡回歸，唔知呢。揀足一個鐘，Eddie同男友人都有收穫，前者更拎住戰利品跳住離開，之後去咗揀護膚品，買夠睇夠就走。
採訪：李權威
↧