澳門賭業猛人周焯華的兒子周柏豪（Pak）雖只得20歲，但已是CEO。有創業兼有搵食頭腦的他在英國讀書時曾用2百英鎊（約2千港元）與朋友合作推出學生優惠卡，兩年賺了20萬英鎊（約200萬港元。他帶着血汗錢回港，再集資逾千萬發展手機App「Wow」（WOW Sport）。剛開始時，收到的大部份是負面聲音，家人亦不贊成他停學做生意，但Pak認為可以從多方面學習，唔一定要讀完大學，並堅持說：「今次未必會輸，就算失敗總好過永遠唔做，起碼吸取到經驗。」慶幸唔使養屋企，可以一條心實踐理想。
兩年前，Pak在英國讀High School時，商科老師曾提出做學生優惠卡生意的Idea，他覺得好好玩，便與兩個同學付諸實行，「我走落Town同商戶傾，叫佢哋畀優惠學生，由於唔使錢，好快有60間商戶參加。」之後他們以每張卡10英鎊（約100港元）賣給學生，共賣了8百張，共賺了8千英鎊（約8萬港元），最重要同學真的用過，仲要讚好用，勁有滿足感。
之後他將賺得的8千英鎊再與朋友夾10萬港元開發手機App「ISG」（International Student's Group），同樣是為學生提供優惠，不同的是每間商戶每年要收取6百英鎊（約6千港元）的費用，但今次就不太順利。「逐間商戶去敲門，試過日日Sell畀人鬧，最後傾到廿幾間，但因為要做功課又要考試，根本兼顧唔到。」由於App有近二萬學生使用，最後成功吸引商戶聯盟公司以20萬英鎊（約2百萬港元）收購。
做App有深層意義
由於Pak想繼續發展這門生意，但同時兼顧學業實在困難，於是他決定放棄升讀大學，並拿着血汗錢回港大搞。由於他想做一個有Global Impact的App，所以返港後即刻搵朋友集資逾千萬港元創立了以運動作交流的社交平台「Wow」。他解釋說：「好多人踢波同玩滑板都好叻，但最終會放棄，唔會諗住做運動員，因為無經濟能力周圍去比賽，所以我就做一個平台畀大家比賽，例如玩滑板鬥高難度，App友提供片段再由其他App友投票，我哋會做個排行榜，冠軍會頒個獎牌畀佢。當你發現好多人同你一樣擁有同一夢想，你就無咁容易放棄。最重要嘅係，我想做一個橋樑，等呢班叻人可以容易啲畀人發掘，等佢哋有資源可以繼續追尋夢想。」
家人反對仍堅持
這個App前所未有，夠晒創新，不過Pak剛開始時，聽到不少負面聲音：「你做唔到㗎，遲啲你會明。」連屋企人都反對：「有大學都唔讀，我嗰陣想讀都無得讀。」他稱爸爸最無所謂，因為他以前都無讀過大學。Pak有信心地表示：「o依家我有18個月去證明畀下一Round嘅投資者睇，呢門生意係有得做，睇吓可唔可以喺燒晒啲錢之前成功。」爸爸會幫手嗎？他笑言：「如果佢有興趣（投資）會打畀我，佢有我手提電話號碼。」
由於要獨力做這門生意，他試過朝早返工半夜收工直踩十幾小時，但工作效益不大，更因太忙碌壓力大，搞到自己爆脹了十幾磅，即使日日做Gym都無用，而請人對於他亦是另一難題，「好多人都無乜責任感。」公司營運十個月，他沉着應戰，見招拆招。而手機App將於日內推出，大家拭目以待。
撰文：李佩儀 攝影：李維隆
↧