有說即將上映的新片《江湖悲劇》是校長譚詠麟的個人表演騷，爆肚對白抵死過癮，觀眾堅係由頭笑到尾，久違大銀幕，校長當然不容有失，親自出面搵人撐場，上至江湖叔父，下至茶客路人甲，粒粒皆星，胡楓、盧海鵬、潘源良、太極、Mr.、羅霖等，個個都係收封利是仔就埋位，簡單嚟講，呢九十分鐘咪就係星，全部都係星囉！
由譚詠麟孭飛演的新片將於下星期上映，久違擔正做男一的譚校長連日來出盡力跑宣傳，上遊戲節目、密集式訪問乜都肯做，還要碌爆自己張人情卡，廣邀圈中老友客串現身。
經典金曲任改詞
校長曾特別推介一場齊集老中青三輩江湖大佬講數嘅重頭戲，連老死叻哥陳百祥都畀面校長客串埋一份。
唔講唔知，原來1979年叻哥已經同校長喺無線舉辦嘅歌唱比賽交過手，點知唱到決賽校長因病缺席，叻哥奪冠搞到叻哥一直耿耿於懷。校長透露，明明差啲搞到腥風血雨，最後都係因為首本名曲點化啲大佬輩最緊要以和為貴，想知呢對老死係唔係37年後終於有得靠支咪一決高下，就要買飛入場搵答案喇！
相隔五年至請得郁譚校長出山再拍江湖片，一係唔拍，校長一拍就用神級演技演活笑爆嘴大佬金銀倫，又不負眾望開金口唱勻首首名曲又同小春rap埋首主題曲，仲有大班串星淨係收利是仔，監製同導演呢啲數口咪叫精囉！
撰文：彭子僖
↧