同無線結束7年賓主關係後，陳倩揚即簽了新經理人作新發展，日前便與名廚Jacky Yu(余健志)合作拍攝電器廣告，期間Jacky仲「醒」佢幾個零失敗食譜，等佢返屋企可以o氹老公囝囝，穩袋6位數字兼有意外收穫令「索媽」好開心。
廣告商睇中「人妻」識享受生活，加上形象正面健康，好啱廣告主題，所以力邀她跟名廚Jacky Yu演出。
廣告中倩揚身穿廚師服扮廚神，落手落腳搓焗乾果芝士波波；Jacky則示範做慢煮三文魚配蜜糖芥辣汁，做番老本行，Jacky從容應付，反觀倩揚除要顧及鏡頭同展示廚藝，仲要畀坐埋一邊嘅Jacky目及到實，顯得既驚又喜，好彩Jacky只係略嫌波波未夠圓，怕焗出嚟效果唔夠好，要親自加工搓多兩吓先入爐。一額汗的倩揚笑說：「o依家先至體會到置身喺烹飪比賽嘅感覺，最初各有各做，只係互動傾幾句感覺好輕鬆，點知到補拍個人鏡頭，Jacky坐埋一邊睇住我整就真係有壓力喇，雖然平日都有入廚，但只係師奶仔煮飯，點及得上大廚咁有專業水準。」
Jacky笑住捧返倩揚：「佢整得都OK，只要做多啲就會掌握得更加好，愈搓會愈圓。」倩揚乘機向Jacky偷師，追問幾時可以拜師學藝分享他的私房菜譜？Jacky竟一口答應：「隨時都可以！」
多謝廣告商支持
回復自由身的陳倩揚努力發展新商機，把握每個機會做到最好：「好開心仍然得到廣告商支持冇壓價，仲加送夢寐以求嘅焗爐畀我煮好餸，真係一次過實現多個願望，(老公咁有口福咪錫晒你？)佢冇理由唔錫我，睇佢個肚腩愈嚟愈大就知佢幸福。」
採訪：方騫平
↧